2026·05·28
Urteroko hitzordua izaten da ekaina iristearekin batera Kirol Astea Idiazabalen. Aurten egun bat lehenago hasiko da, maiatzaren 31n, San Adrian pilota jaialdiarekin. Hona hemen xehetuta egitaraua:
- maiatzak 31, igandea: San Adrian pilota jaialdia, Igarondo pilotalekuan, 16:30ean hasita.
- ekainak 2, asteartea: goizean, 11:00etan, Izalbiraren asteroko irteera egingo dute Plaza Nagusitik abiatuta.
Arratsaldean, Mattin Iñiguezek Red Bull X-Alps: Alpeak alderik alde hegan eta oinez ikus-entzunezkoa eskainiko du udaletxeko Areto Nagusian, 18:30ean. Lasterketa horretan parte hartzea Mattin Iñiguez zegamarraren biziko erronka izan da, eta bizitako momentu ikusgarrienak eta hunkigarrienak partekatuko ditu gurekin Kirol Astearen barruan.
- ekainak 3, asteazkena: irailean Idiazabalen jokatuko den Orientazio Raidaren aurkezpena egingo dute antolatzaileek udaletxeko Areto Nagusian, 19:00etan. Aurretik, 17:00etan, haurrei zuzendutako orientazio saioa egingo da, udaletxean hasita.
- ekainak 5, ostirala: haurrentzako mendiko bizikletako ikastaroa egingo da, bi taldetan banaturik. 17:00etan LH1-3 mailakoen txanda izango da eta 18:00etan LH4-6 mailakoena. Eskolako patioan elkartuko dira eta ondoren pump track-era joango dira. Izena emateko kultura@idiazabal.eus helbidera idatzi behar da.
Ostiralean ere Atxurbide elkartearen 50. urtemugako pala partida jokatuko da Igarondo pilotalekuan, 19:00etan hasita. Bi bikote lehiatuko dira: Unanue-Etxeberria eta Ormazabal-Muñoa.
- ekainak 7, igandean: Emakumezkoen IV. Frontenis Topaketa egingo da Igarondo pilotalekuan, 10:00etatik aurrera.