Berriak
Atzealdea
Idiazabalgo Udalak Berdintasun Diagnostikoa egingo du
Idiazabal parekide baten bidean, pauso bat aurrera lelopean egin da gaur eguerdian garatzen ari den prozesuaren aurkezpena
2020·11·11
IDIAZABAL PAREKIDE BATEN BIDEAN, PAUSO BAT AURRERA!
- Plana diseinatzeko prozesuak bi fase nagusi izango ditu. Lehenik eta behin, irailetik abendura bitarte, Idiazabalgo berdintasun-egoeraren inguruko diagnostikoa egingo da. Behin gaur egungo egoeraren argazkia aterata, eta diagnostikoaren emaitza nagusiak kontuan hartuta, urtarriletik aurrera Berdintasunerako Plana diseinatuko da.
- Prozesua irailean abiatu zen. Hasteko, Talde Eragilea sortu zen prozesuari etengabeko jarraipena egiteko. Bertan, berdintasuneko arduradun politikoak, arduradun teknikoak eta Elhuyarreko teknikariek hartzen dute parte.
- Lehenengo zereginetako bat izan da udal-teknikari eta ordezkari politikoekin lan-saioa egitea. Saio hori urriaren 5ean egin zen. Bi lanketa-gai nagusi izan ziren: batetik, berdintasunaren inguruko sentsibilizazioa landu zen, eta, bestetik, martxan jarritako prozesua aurkeztu eta kontrastatu zen. Guztira 14 pertsonak hartu zuten parte.
- Ondoren, diagnostikoaren lanketari heldu zaio. Diagnostikoak balioko du Idiazabalgo emakumeen eta gizonen errealitatea ezagutzeko.
Batetik, informazio kuantitatiboa jasoko da, hau da, iturri desberdinetatik eskuratutako hainbat eremuetako gaur egungo datuak bilduko dira: kultura, kirola, hezkuntza eta gazteria, euskara… Bestetik, informazio kualitatiboa jasoko da. Herriko emakume-kolektiboekin talde-elkarrizketak egingo dira, gaur egun dituzten arazoak, beharrak, kezkak.., zeintzuk diren gertutik ezagutzeko, eta aurrera begirako erronkak identifikatzeko. Zehazki, emakume-kolektibo hauek elkarrizketatuko dira:
- Aizan! Talde feministako emakumeak
- Adineko emakumeak edota emakume jubilatuak
- Emakume adituak, edo genero-gaiak lantzen dituztenak
- Udalerriko beste hainbat alorretan diharduten emakumeak: kulturan eta kirolean dabiltzan emakumeak; lan-sektore jakinetan (industrian, merkataritzan, lehen sektorean…) dabiltzan emakumeak
Guztira 5 elkarrizketa egingo dira.
- Jasotako informazio guztiarekin, diagnostiko-txostena landuko da, eta lan-saio irekia egingo da berau herritarrei aurkezteko eta euren ekarpenekin aberasteko.
- Diagnostikoan identifikatutako hobetu beharreko alderdiak aintzat hartuta, Berdintasunerako I. Plana diseinatuko da datorren urtean. Garrantzitsua izango da diseinatzen den plana egingarria, pragmatikoa, errealista eta ongi dimentsionatutakoa izatea.